Growing Maharashtra : इंदापुर प्रतिनिधी
इंदापूर, दि. २५ ऑगस्ट २०२५ : इंदापूर येथे २४ ऑगस्ट रोजी लोकल मिडीया न्यूज पोर्टलच्या वर्धापन दिनानिमित्त आयोजित कार्यक्रमात राष्ट्रीय साखर महासंघाचे अध्यक्ष तथा इंदापूर तालुक्याचे ज्येष्ठ नेते हर्षवर्धन पाटील यांनी भाजप नेते प्रवीण माने यांच्या “पुढारी बाजारात गेले” या बेताल वक्तव्यावर तीव्र नाराजी व्यक्त करत त्यांना चांगलेच खडसावले.
या कार्यक्रमाला बारामतीच्या खासदार सुप्रिया सुळे, कृषी उत्पन्न बाजार समितीचे माजी सभापती मयूर पाटील, राष्ट्रवादी काँग्रेसचे जिल्हाध्यक्ष प्रदीप गारटकर यांच्यासह इंदापूर तालुक्यातील अनेक मान्यवर उपस्थित होते.प्रवीण माने यांनी आपल्या भाषणात “पुढारी बाजारात गेले” असे वक्तव्य केले, ज्यावर
हर्षवर्धन पाटील यांनी तीक्ष्ण प्रतिक्रिया देत म्हटले, “इंदापूर तालुक्याची एक संस्कृती आहे आणि त्यामध्ये पुढाऱ्यांची एक प्रतिमा आहे. ‘पुढारी बाजारात गेले’ हे वाक्य चुकीचे आहे आणि यामुळे तालुक्याच्या सांस्कृतिक प्रतिमेला धक्का पोहोचतो.” पाटील यांनी अतिशय परखडपणे आणि जबाबदारीने माने यांना हे वक्तव्य का चुकीचे आहे, हे समजावून सांगितले. त्यांच्या या स्पष्ट शब्दांमुळे प्रवीण माने यांचा चेहरा पडल्याचे उपस्थितांना स्पष्ट दिसून आले.
या घटनेनंतर उपस्थितांमध्ये चर्चेला उधाण आले असून, येत्या काळात प्रवीण माने यावर काय प्रतिक्रिया देणार, याकडे सर्वांचे लक्ष लागले आहे. हर्षवर्धन पाटील यांच्या या परखड भूमिकेने इंदापूरच्या राजकीय वर्तुळात नव्या चर्चेला तोंड फोडले आहे.
बातमी व जाहिरातसाठी संपर्क : 9011639163 (Only Whats App)
[…] इंदापूरात हर्षवर्धन पाटलांनी टोचले प… […]